اساتذہ کے لیے جدید ٹیکنالوجی کی تربیت کا انقلابی اقدام

جہلم (مخدوم حسین چوہدری سے)
ڈپٹی کمشنر جہلم میر رضا اوزگن کی خصوصی ہدایات پر لٹریسی ڈیپارٹمنٹ کے زیرِ اہتمام ضلع کونسل ہال جہلم میں اساتذہ کے لیے پہلی مرتبہ آرٹیفشل انٹیلیجنس (AI) پر مبنی تربیتی کلاسز کا باقاعدہ آغاز کر دیا گیا ہے۔ اس جدید تربیتی پروگرام کا مقصد اساتذہ اور فیلڈ اسٹاف کو جدید ڈیجیٹل ٹیکنالوجی سے ہم آہنگ کرنا اور تعلیمی نظام کو دورِ حاضر کے تقاضوں کے مطابق استوار کرنا ہے۔

ذرائع کے مطابق یہ تربیتی سیشنز آئی ٹی ماہر علی عباس زیدی کی زیر نگرانی منعقد کیے جا رہے ہیں، جو شرکاء کو آرٹیفشل انٹیلیجنس کے بنیادی اور جدید تصورات، ڈیجیٹل ٹولز، تعلیمی سافٹ ویئرز اور ان کے عملی استعمال سے متعلق جامع تربیت فراہم کریں گے۔ ان کلاسز میں اس بات پر خصوصی توجہ دی جا رہی ہے کہ اساتذہ جدید ٹیکنالوجی کو تدریسی عمل میں مؤثر انداز میں بروئے کار لا سکیں۔

اس منصوبے کے تحت لٹریسی اور نان فارمل بیسک ایجوکیشن سکولز کے اساتذہ، عملے اور فیلڈ اسٹاف کے علاوہ مڈل سکولوں کے طلبا و طالبات کے لیے بھی تین ماہ اور چھ ماہ پر مشتمل خصوصی تربیتی پروگرام ترتیب دیے گئے ہیں۔ ان پروگرامز کا مقصد نہ صرف اساتذہ کی پیشہ ورانہ صلاحیتوں میں اضافہ کرنا ہے بلکہ طلبا کو بھی جدید سائنسی اور ٹیکنالوجی سے متعلق آگاہی فراہم کرنا ہے تاکہ وہ مستقبل کے چیلنجز کا بہتر انداز میں مقابلہ کر سکیں۔

ڈپٹی کمشنر جہلم میر رضا اوزگن نے اس موقع پر اپنے پیغام میں کہا کہ ضلع جہلم کے تعلیمی نظام کو ڈیجیٹل بنیادوں پر استوار کرنا وقت کی اہم ضرورت ہے۔ انہوں نے کہا کہ اساتذہ کسی بھی تعلیمی نظام کی ریڑھ کی ہڈی ہوتے ہیں اور اگر انہیں جدید ٹیکنالوجی سے لیس کر دیا جائے تو تعلیمی معیار میں نمایاں بہتری لائی جا سکتی ہے۔ ان کا کہنا تھا کہ آرٹیفشل انٹیلیجنس جیسے جدید مضامین کی تربیت لٹریسی ڈیپارٹمنٹ کا ایک انقلابی قدم ہے جو مستقبل میں مثبت نتائج دے گا۔

میر رضا اوزگن نے مزید کہا کہ اساتذہ کی پیشہ ورانہ تربیت کے ذریعے نہ صرف شرحِ خواندگی میں اضافہ ممکن ہو گا بلکہ نان فارمل ایجوکیشن کے شعبے میں بھی معیار تعلیم کو بہتر بنایا جا سکے گا۔ انہوں نے متعلقہ افسران کو ہدایت کی کہ ان تربیتی پروگرامز کو تسلسل کے ساتھ جاری رکھا جائے اور زیادہ سے زیادہ اساتذہ اور طلبا کو اس سے مستفید ہونے کا موقع فراہم کیا جائے۔

شرکاء نے اس اقدام کو خوش آئند قرار دیتے ہوئے کہا کہ آرٹیفشل انٹیلیجنس کی تربیت انہیں جدید تدریسی طریقوں سے روشناس کرائے گی اور وہ اپنے تعلیمی اداروں میں بہتر انداز میں علم منتقل کر سکیں گے۔ انہوں نے ضلعی انتظامیہ اور لٹریسی ڈیپارٹمنٹ کا شکریہ ادا کیا کہ پہلی مرتبہ اس نوعیت کا جدید اور دور رس نتائج کا حامل پروگرام متعارف کروایا گیا ہے۔

آخر میں حکام نے اس امید کا اظہار کیا کہ یہ تربیتی پروگرام ضلع جہلم میں تعلیمی ترقی، ڈیجیٹل آگاہی اور جدید ٹیکنالوجی کے فروغ میں سنگِ میل ثابت ہوگا۔