(سید عاطف ندیم-پاکستان): پاکستان فوج کے شعبہ تعلقات عامہ (آئی ایس پی آر) کے مطابق کور کمانڈرز کانفرنس نے ’فلسطینی عوام کے ساتھ مکمل یکجہتی کا اظہار کیا اور غزہ میں انسانی حقوق کی سنگین خلاف ورزیوں اور جنگی جرائم کی مذمت کی۔‘
جنرل ہیڈکوارٹرز، راولپنڈی میں آرمی چیف جنرل سید عاصم منیر کی زیر صدارت جمعے کو منعقد ہونے والی 268 ویں کور کمانڈرز کانفرنس نے ’فلسطین کے عوام کی واضح سفارتی، سیاسی اور اخلاقی حمایت کا اعادہ بھی کیا۔‘
پاک فوج کے شعبہ تعلقات عامہ (آئی ایس پی آر) کی جانب سے جاری اعلامیے میں کہا گیا ہے کہ دہشت گردوں کے سہولت کاروں، حامیوں کے خلاف بھرپور طاقت استعمال کی جائے گی، بلوچستان میں کسی کو امن خراب کرنے کی اجازت نہیں دیں گے۔
آئی ایس پی آر کا کہنا تھا کہ فورم مسلح افواج، قانون نافذ کرنے والے اداروں اور شہریوں کے شہداء کی عظیم قربانیوں کو زبردست خراج عقیدت پیش کیا جنہوں نے ملک میں امن و استحکام کے لیے اپنی جانوں کا نذرانہ پیش کیا۔
آئی ایس پی آر کے ایک بیان کے مطابق: ’نیشنل ایکشن پلان کے دائرہ کار کے تحت وژن عزم استحکام کی حکمت عملی کے تیز اور موثر نفاذ پر زور دیتے ہوئے دہشت گردی سے متعلق پوری قوم کے مشترکہ اور اجتماعی نقطہ نظر کی ضرورت کو اجاگر کیا۔
’ریاستی مشینری اور ادارے آئین کے دائرے میں رہتے ہوئے قانون پر پوری استقامت سے عمل درآمد کریں گے اور کسی قسم کی نرمی اور کوتاہی نہیں برتی جائے گی۔‘
آئی ایس پی آر کے بیان میں بتایا گیا کہ کانفرنس کو موجودہ جیو سٹریٹجک ماحول، ابھرتے ہوئے قومی سلامتی کے چیلنجز اور خطرات کے خلاف پاکستان کے سٹریٹجک ردعمل کے بارے میں بریفنگ دی گئی۔
بیان کے مطابق: ’علاقائی اور داخلی سلامتی کی محرکات کا باریک بینی سے جائزہ لیتے ہوئے، کانفرنس نے ہر قیمت پر دہشت گردی کو اس کی تمام شکلوں اور مظاہر میں ختم کرنے کے اپنے عزم کا اعادہ کیا۔ اس نے ملک کو غیر مستحکم کرنے کی کوشش کرنے والے دشمن عناصر کی ایما پر کام کرنے والے سہولت کاروں اور ان کی حوصلہ افزائی کرنے والوں کے خلاف ریاست کی پوری طاقت لانے کے لیے پاکستان کے غیر متزلزل عزم کا بھی اعادہ کیا۔‘
آئی ایس پی آر کے مطابق آرمی چیف نے پاکستان بھر میں ڈسٹرکٹ کوآرڈینیشن کمیٹیوں کے قیام کو سراہتے ہوئے نیشنل ایکشن پلان پر عملدرآمد کو تیز کرنے اور بین الادارہ جاتی تعاون کو یقینی بنانے کے لیے حکومتی ہدایات کے مطابق پائیدار اور مربوط کوششوں کی ضرورت پر زور دیا۔
آرمی چیف نے اس عزم کا اعادہ کیا کہ پاک فوج حکومت اور قانون نافذ کرنے والے اداروں کو غیر قانونی معاشی سرگرمیوں کے خلاف سخت قانونی اقدامات کے نفاذ میں مکمل تعاون فراہم کرے گی جو دہشت گردی کی مالی معاونت سے جڑی ہوئی ہیں، جنرل عاصم منیر کا مزید کہا تھا کہ پاکستان میں دہشت گردوں اور ان کے سہولت کاروں کے لیے کوئی جگہ نہیں ہے۔
اعلامیے کے مطابق فورم نے بھارت کے غیر قانونی طور پر مقبوضہ کشمیر میں انسانی حقوق کی مسلسل اور سنگین خلاف ورزیوں اور لائن آف کنٹرول (ایل او سی) پر بھارتی فوج کی بلا اشتعال جنگ بندی کی خلاف ورزیوں پر گہری تشویش کا اظہار کیا۔
فورم کا کہنا تھا کہ پاکستان کی جانب سے بھارت کے غیر قانونی طور پر مقبوضہ کشمیر کے عوام کے منصفانہ مقصد کے لیے گہری اور غیر متزلزل حمایت اور عالمی سطح پر جاری انسانی حقوق کی خلاف ورزیوں کو اجاگر کرنے کے لیے مسلسل سفارتی رابطے کی ضرورت ہے۔
اعلامیے کے مطابق فورم نے فلسطین کے عوام کے ساتھ مکمل یکجہتی کا اظہار کیا اور غزہ میں انسانی حقوق کی سنگین خلاف ورزیوں اور جنگی جرائم کی مذمت کی، جبکہ فلسطینی عوام کی سفارتی، سیاسی اور اخلاقی حمایت کا بھی اعادہ کیا۔
آئی ایس پی آر کے مطابق آخر میں آرمی چیف نے فیلڈ کمانڈروں کو ہدایت کی کہ وہ آپریشنل تیاریوں اور پیشہ ورانہ مہارت کے اعلیٰ ترین معیارکو برقرار رکھیں اور جنگی تیاریوں کو برقرار رکھنے کے لیے سخت تربیت کو یقینی بنائیں۔
