گرین لینڈ پر امریکی کنٹرول سے کم کا سودا نا قابل قبول، ڈونلڈ ٹرمپ

امریکی صدر ڈونلڈ ٹرمپ نے بدھ کے روز سوشل میڈیا پر  ایک بیان میں کہا کہ گرین لینڈ پر امریکی کنٹرول سے کم کوئی  بھی آپشن ’’ناقابل قبول‘‘ ہے۔ یہ بیان اس وقت سامنے آیا جب چند گھنٹے بعد ہی امریکی نائب صدر جے ڈی وینس ڈنمارک اور گرین لینڈ کے حکام کے ساتھ مذاکرات کی میزبانی کرنے والے تھے۔
ٹرمپ نے اپنی پوسٹ میں دعویٰ کیا، ’’گرین لینڈ کے امریکہ کے ہاتھ میں ہونے سے نیٹو اتحاد کہیں زیادہ طاقتور اور مؤثر بن جائے گا۔‘‘

ایران کے حوالے سےامریکی  صدر نے یہ دھمکی بھی دی کہ وہ ان ممالک س درآمدات پر 25 فیصد ٹیکس عائد کریں گے جو ایران کے ساتھ کاروبار جاری رکھے ہوئے ہیں۔ ماہرین کے مطابق اس اقدام سے امریکی صارفین کے لیے اشیاء کی قیمتوں میں اضافہ ہو سکتا ہے اور امریکی ایرانی کشیدگی مزید شدت اختیار کر سکتی ہے۔ ایران میں پہلے ہی افراط زر کی شرح 40 فیصد سے تجاوز کر چکی ہے۔
ادھر امریکی سینیٹ میں بدھ کے روز وہ قرارداد پیش کی جا رہی ہے، جس کا مقصد صدر ٹرمپ کو وینزویلا کے خلاف مزید فوجی کارروائیوں سے روکنا ہے۔

شدید سیاسی دباؤ کے درمیان ایک عوامی سروے میں، جو وینزویلا کے صدر نکولاس مادورو کی تین جنوری کو گرفتاری کے بعد کرایا گیا، 56 فیصد بالغ امریکی شہریوں نے کہا کہ ڈونلڈ ٹرمپ نے بیرون ملک فوجی مداخلتوں کے حوالے سے حد سے بڑھ کر اقدامات کیے ہیں۔ اس سروے میں رائے دہندگان کی اکثریت نے ٹرمپ کی خارجہ پالیسی پر بحیثیت مجموعی  عدم اطمینان کا اظہار بھی کیا۔