وزیراعظم شہباز شریف کا اسلام آباد میں پاکستان آسان خدمت مرکز کا افتتاح، عوامی سہولیات کے فروغ پر زور

سید عاطف ندیم-پاکستان،وائس آف جرمنی اردو نیوز کے ساتھ
وزیراعظم محمد شہباز شریف نے اسلام آباد میں پاکستان آسان خدمت مرکز کا باقاعدہ افتتاح کر دیا۔ اس موقع پر انہوں نے مرکز کی مینجمنٹ اور عملے کی کارکردگی کو سراہتے ہوئے کہا کہ یہ ادارہ عوام کو سہولیات کی فراہمی کے لیے ایک اہم قدم ہے اور اس سے شہریوں کو مختلف سرکاری خدمات ایک ہی چھت تلے میسر آئیں گی۔
افتتاحی تقریب سے خطاب کرتے ہوئے وزیراعظم نے کہا کہ وہ پاکستان آسان خدمت مرکز کی انتظامیہ کو دل کی گہرائیوں سے مبارکباد اور شکریہ پیش کرتے ہیں۔ انہوں نے کہا کہ اس مرکز کے قیام کا بنیادی مقصد عوام کو سہولت، شفافیت اور عزت کے ساتھ خدمات فراہم کرنا ہے، اور اس مقصد کے حصول کے لیے عملے کا رویہ، طرزِ عمل اور پیشہ ورانہ صلاحیت کلیدی حیثیت رکھتی ہے۔
وزیراعظم شہباز شریف نے عملے کو ہدایت کی کہ وہ یہاں آنے والے شہریوں کے ساتھ خوش اخلاقی، احترام اور خندہ پیشانی سے پیش آئیں تاکہ عوام کا اعتماد بڑھے اور زیادہ سے زیادہ لوگ اس ادارے سے فائدہ اٹھا سکیں۔ انہوں نے کہا، “میری گزارش ہے کہ آپ کے رویے سے یہاں آنے والے کسٹمرز میں اعتماد اور رغبت بڑھے، تاکہ عوام بلا جھجھک اس ادارے سے مستفید ہوں۔”
انہوں نے مزید کہا کہ پاکستان آسان خدمت مرکز جس مقصد کے لیے قائم کیا گیا ہے اور جس مقصد کے لیے قومی وسائل اور سرمایہ خرچ ہوا ہے، عوام کو اس سے بھرپور فائدہ پہنچنا چاہیے۔ وزیراعظم کا کہنا تھا کہ یہ مرکز حکومت کے اس عزم کا مظہر ہے جس کے تحت سرکاری خدمات کو جدید تقاضوں سے ہم آہنگ کیا جا رہا ہے اور عوامی مسائل کے فوری اور مؤثر حل کو یقینی بنایا جا رہا ہے۔
وزیراعظم نے اس بات پر زور دیا کہ عملے کی مسکراہٹ، خدمت کا جذبہ اور مستعدی نہ صرف عوام کے لیے آسانی پیدا کرے گی بلکہ یہ ایک نیکی اور خدمتِ خلق کا ذریعہ بھی بنے گی۔ انہوں نے کہا، “آپ کی مسکراہٹ، خدمت اور مستعدی کے ذریعے آپ دین اور دنیا دونوں کمائیں گے، کیونکہ عوام کی خدمت دراصل اللہ کی مخلوق کی خدمت ہے۔”
تقریب کے دوران وزیراعظم کو پاکستان آسان خدمت مرکز میں فراہم کی جانے والی سہولیات کے بارے میں بریفنگ بھی دی گئی۔ انہیں بتایا گیا کہ اس مرکز میں مختلف سرکاری محکموں سے متعلق خدمات ایک ہی جگہ فراہم کی جائیں گی، جس سے شہریوں کو دفاتر کے چکر لگانے سے نجات ملے گی اور وقت اور وسائل کی بچت ہوگی۔
وزیراعظم شہباز شریف نے اس امید کا اظہار کیا کہ پاکستان آسان خدمت مرکز کا ماڈل مستقبل میں ملک کے دیگر شہروں میں بھی متعارف کرایا جائے گا تاکہ زیادہ سے زیادہ شہری جدید، شفاف اور مؤثر عوامی خدمات سے مستفید ہو سکیں۔ انہوں نے کہا کہ حکومت عوامی فلاح و بہبود کو اپنی اولین ترجیح بنا کر کام کر رہی ہے اور ایسے منصوبے عوام اور حکومت کے درمیان اعتماد کو مضبوط بنانے میں اہم کردار ادا کریں گے۔