سری لنکا: ایسٹر بم دھماکوں میں ملوث 15 افراد کو 200 سے 260 سال تک قید کی سزا

تین ججوں پر مشتمل ہائی کورٹ بینچ نے منگل کو فیصلہ سناتے ہوئے مجرموں کی جائیدادیں ضبط کرنے کا بھی حکم دیا۔ تقریباً پانچ سال تک جاری رہنے والے مقدمے کا فیصلہ سخت سکیورٹی میں سنایا گیا اور اس موقع پر عدالت کے اطراف سینکڑوں پولیس اہلکار تعینات کیے گئے تھے۔

21 اپریل 2019 کو ایسٹر کے موقع پر سری لنکا کے مختلف علاقوں میں تین گرجا گھروں اور تین ہوٹلوں کو خودکش بم حملوں کا نشانہ بنایا گیا تھا۔ ایک اور دھماکا ایک موٹل میں ہوا تھا، جہاں ایک حملہ آور نے چوتھے ہوٹل کو نشانہ بنانے کا منصوبہ ترک کرنے کے بعد خود کو دھماکے سے اڑا لیا تھا۔ ہلاک ہونے والوں میں 42 غیر ملکی شہری بھی شامل تھے۔

ان حملوں کو شدت پسند تنظیم داعش سے متاثرہ کارروائی قرار دیا گیا تھا اور سری لنکا میں سرگرم دو شدت پسند گروپوں پر ان میں ملوث ہونے کا الزام عائد کیا گیا۔ حملوں میں براہ راست حصہ لینے والے تمام افراد پہلے ہی ہلاک ہو چکے ہیں۔

سری لنکن حکام نے 2021 میں 25 ملزمان کے خلاف 23 ہزار 270 الزامات عائد کیے تھے، جن میں قتل، دہشت گردی کی سازش اور اسلحہ و دھماکا خیز مواد سے متعلق جرائم شامل تھے۔ ایک ملزم مقدمے کے دوران ہلاک ہو گیا، جبکہ عدالت نے نو ملزمان کو الزامات ثابت نہ ہونے پر بری کر دیا۔

سزا پانے والے تمام 15 افراد کا تعلق سری لنکا کی مسلم اقلیت سے ہے۔ عدالت نے ان کے کردار اور حملوں کی سازش میں معاونت کی نوعیت کے مطابق مختلف سزائیں سنائیں۔ پانچ افراد کو 200 سال، پانچ کو 220 سال، چار کو 240 سال اور ایک کو 260 سال قید کی سزا دی گئی۔