یمن میں مارکیٹ پر حملہ، 7 افراد ہلاک، 40 زخمی

دوسری جانب یمن میں جاری لڑائی نے بھی شہریوں کے لیے خطرات بڑھا دیے ہیں۔ صوبہ تعز کے علاقے ماویہ جنکشن میں ایک مارکیٹ کی دکانوں پر ہونے والے حملے کے نتیجے میں بچوں سمیت 7 افراد ہلاک اور 40 زخمی ہوگئے۔

حوثیوں کے زیرِ انتظام وزارتِ صحت نے دعویٰ کیا ہے کہ حملے میں تجارتی دکانوں کو نشانہ بنایا گیا۔ تاہم یمن کی بین الاقوامی طور پر تسلیم شدہ حکومت نے مختلف مؤقف اختیار کرتے ہوئے کہا کہ اس کی افواج نے اسی علاقے میں موجود حوثی فوجی کیمپ اور فوجی گاڑیوں کو نشانہ بنایا تھا۔
یمنی حکومت سے وابستہ تین فوجی ذرائع نے خبر رساں ادارے رائٹرز کو بتایا کہ حوثی جنگجوؤں نے حال ہی میں مارکیٹ کے قریب ایک فوجی کیمپ قائم کیا تھا۔ حملے کے ہدف اور کارروائی کی مکمل نوعیت کے حوالے سے دونوں فریقوں کے بیانات مختلف ہیں اور ان تفصیلات کی آزادانہ تصدیق فوری طور پر ممکن نہیں ہوسکی۔
یہ واقعہ یمن میں حوثیوں اور سعودی حمایت یافتہ حکومتی فورسز کے درمیان بڑھتی ہوئی فوجی کشیدگی کے پس منظر میں پیش آیا ہے۔ حالیہ دنوں میں سعودی عرب نے بھی حوثیوں کی جانب سے ڈرون اور میزائل حملوں کی اطلاعات کے بعد اپنے فضائی دفاع کو متحرک کیا ہے۔