15 اپریل سے 20 اپریل کے دوران آندھی طوفان اور تیز ہواؤں کے ساتھ گرج چمک کے ساتھ بارش کا امکان ہے

لاہور پاکستان(نمائندہ وائس آف جرمنی):‌ڈائریکٹر جنرل پراونشل ڈیزاسٹر مینجمنٹ اتھارٹی پنجاب فلائیٹ لیفٹیننٹ ریٹائرڈ عمران قریشی نے کہا ہے کہ مغربی ہوائیں 15 اپریل کو ملک کے بالائی علاقوں میں داخل ہوں گی جو بعد میں مغربی سے وسطی علاقوں تک پھیل جائیں گی۔جس کے باعث 15 اپریل سے 20 اپریل کے دوران مری، اسلام آباد، راولپنڈی، اٹک، چکوال اورجہلم میں آندھی طوفان اور تیز ہواؤں کے ساتھ گرج چمک کے ساتھ بارش کا امکان ہے ، اسی دوران چند مقامات پر موسلادھار بارش اور ژ ا لہ باری کا بھی امکان ہے۔
ڈی جی پی ڈی ایم اے نے کہا کہ 17 اور18 اپریل کو لاہور ، ملتان، ڈی جی خان، راجن پور، بہاولپور، رحیم یار خان، بہاولنگر، لیہ، بھکر خوشاب اور میانوالی ، سرگودھا، گجرات، حافظ آباد، منڈی بہاؤالدین، سیالکوٹ، نارووال، ساہیوال، اوکاڑہ، فیصل آباد، ٹوبہ ٹیک سنگھ ، جھنگ، قصور، شیخوپورہ اور ننکانہ صاحب میں بھی آندھی/تیز ہواؤں اور گرج چمک کے ساتھ ہلکی بارش کا امکان ہے اور مری کے پہاڑی علاقوں میں لینڈ سلائیڈنگ کا بھی خدشہ ہے۔انہوں نے کہا کہ آندھی/تیز ہواؤں اور ژالہ باری کے باعث کھڑی فصلوں(بالخصوس گندم) اور کمزور انفرسٹرکچر کو نقصان کا خطرہ ہے ، کسان حضرات موسمیاتی پیش گوئی کو مدنظر رکھتے ہوےُ اپنے معمولات ترتیب دیں۔انہوں نے کہا کہ پی ڈی ایم اے نے بارش کے دوران سیاحوں کو محتاط رہنے کی ہدایت جاری کر دی ہیں انہوں نے مزید کہا کہ پنجاب کے شہری ہنگامی صورتحال میں پی ڈی ایم اے کی ہیلپ لائن 1129 پر کال کرکے مدد حاصل کر سکتے ہیں۔