ڈی آئی جی آپریشنز سید علی ناصر رضوی کی زیر قیادت فرضی مشق کا انعقاد

لاہور پاکستان(نمائندہ وائس آف جرمنی): ڈی آئی جی آپریشنزلاہور سید علی ناصر رضوی کی زیر قیادت پولیس لائنز قلعہ گجر سنگھ میں ہنگامی صورتحال سے نمٹنے کیلئے فرضی مشق کا انعقادکیا گیا۔ ایس پی ہیڈ کوارٹرز، ایس پی سکیورٹی سمیت دیگر قانون نافذ کرنے والے اداروں کے افسران موقع پر موجود تھے۔پاک فوج، ایلیٹ فورس، بم ڈسپوزل سکواڈ، ریسکیو1122، سپیشل برانچ و دیگر الائیڈ ڈیپارٹمنٹس نے موک ایکسر سائز میں حصہ لیا۔ الارم بجا کر فرضی حملہ تخلیق کر کے جوانوں کاریسپانڈ ٹائم اور پیشہ وارانہ صلاحیتوں کا جائزہ لیا گیا۔پاک فوج کے دستے اور پولیس یونٹس نے فرضی حملہ کو ناکام بنانے میں انتہائی پیشہ ورانہ مہارت کا مظاہرہ کیا۔ ڈی آئی جی آپریشنزنے اس موقع پر کہا کہ لاہور پولیس شہریوں کے جان و مال کی حفاظت کیلئے الرٹ ہے اور کسی بھی ہنگامی صورتحال سے نمٹنے کیلئے مکمل تیار ہے۔ انہوں نے کہا کہ حاضر دماغی، مربوط کوآرڈینیشن سے کسی بھی چیلنج کا مقابلہ کیا جاسکتا ہے۔موک ایکسرسائز کا مقصد فورسز کو ہمہ وقت چاک و چوبند رکھنا ہے۔ سید علی ناصر رضوی نے ہنگامی صورتحال سے نبردآزما ہونے کی مشقیں جاری رکھنے کی ہدایت کی۔