ٹریفک مسائل کے حل کیلئے شہریوں کو مہم کا حصہ بنانے کا فیصلہ، ہر فورم پر ٹریفک آگاہی کے شعور کو اجاگر کیا جائے گا، سی ٹی او ڈاکٹر اسد ملہی

لاہور پاکستان(نمائندہ وائس آف جرمنی):‌سی ٹی او لاہور ڈاکٹر اسد ملہی کا کہنا ہے کہ ٹریفک مسائل اور ان کے ممکنہ حل کیلئے شہریوں کو روڈ سیفٹی مہم کا حصہ بنایا جائے گا، سٹی ٹریفک پولیس شہریوں کے تعاون کے بغیر مطلوبہ نتائج حاصل نہیں کرسکتی، روڈ سیفٹی بارے شعور اجاگر کرنے کےلئے شہریوں کو بھی شامل کیا جائے گا، اسی سلسلہ میں جمعہ کی نماز کے دوران سی ٹی او لاہور ڈاکٹر اسد ملہی کی ہدایت پر شہر کی 34 مساجد میں ٹریفک آگاہی لیکچرز کا اہتمام کیا گیا، ٹریفک انسپکٹرز نے مساجد میں روڈ سیفٹی پر لیکچرز دیئے، ون وے، ہیلمٹ، بغیر لائسنس سمیت دیگر خلاف ورزیوں پر آگاہی لیکچرز دئیے گئے، لیکچرز کے دوران ٹریفک انسپکٹرز کا کہنا تھا کہ دینی و دنیاوی تعلیم کے ساتھ ساتھ ٹریفک ایجوکیشن بھی لازم و ملزوم ہے، ٹریفک قوانین دراصل حقوق العباد کا حصہ ہیں اور قران مجید میں بھی ارشاد ہے کہ جس نے ایک شخص کی جان بچائی، گویا پوری انسانیت کی جان بچائی، سی ٹی او لاہور ڈاکٹر اسد ملہی کا اس حوالے سے کہنا تھا کہ لیکچرز کا مقصد آگاہی دیتے ہوئے شہریوں کی جان و مال کو بچانا ہے، اسلام ہمیں حقوق العباد کا درس دیتا ہے، سفر کرتے ہوئے صبر،برداشت کے دامن کو نہیں چھوڑنا چاہیے، ڈاکٹر اسد ملہی کا مزید کہنا تھا کہ سڑک پر چھوٹی سے چھوٹی لاپرواہی سے کسی کی جان جاسکتی ہے، والدین کم عمر بچوں کو موٹر سائیکل،گاڑی ہرگز مت چلانے دیں، روڈ سیفٹی بارے شعور ہر فورم پر اجاگر کیا جا رہا ہے،