امپورٹڈ حکومت کی گراوٹ کا اندازہ اس بات سے لگایا جا سکتا ہے کہ وہ ایف آئی آر کاٹنے کی بجائے عمران خان کا مذاق اڑا رہی ہے : فیاض الحسن چوہان

لاہور پاکستان(نمائندہ وائس آف جرمنی):‌ترجمان وزیر اعلیٰ پنجاب فیاض الحسن چوہان نے رانا ثناء اللہ کی جانب سے عمران خان کو لگنے والی گولیوں کا مذاق اڑانے پر بیان دیتے ہوئے کہا کہ امپورٹڈ حکومت کی گراوٹ کا اندازہ اس سے لگایا جا سکتا ہے کہ وہ ایف آئی آر کاٹنے کی بجائے عمران خان کا مذاق اڑا رہی ہے۔یہ لوگ وفاقی اداروں کو استعمال کر کے افسران بالا اور جے آئی ٹی پر اثر انداز ہو رہے ہیں۔ ان کا کہنا تھا کہ عمران خان نواز شریف کی طرح بیماری کا ڈراما رچا کر ملک سے فرار نہیں ہوا۔عمران خان نے پاکستان کے اندر رہ کر ہمت اور جرات کے ساتھ سازشوں ، ظلم و جبر اور استبداد کا مقابلہ کیا ہے۔ انہوں نے کہا کہ جو آنکھوں دیکھا مجرم عمران خان پر گولی چلاتا پکڑا گیا اسے میڈیا پر بٹھا کر عمران خان کو مورد الزام ٹھہرانے کی کوشش کی گئی۔یہ ” چور الٹا کوتوال کو ڈانٹے” کی واضح اور گھٹیا مثال ہے۔ن لیگی قیادت کا ملزم نوید کے وکیل کو میڈیا پر بٹھانے سے عمران خان کی عزت اور توقیر میں اضافہ ہوا ہے۔ انکا مزید کہنا تھا کہ عمران خان جیسے پاپولر لیڈر پر حملہ پاکستان کی سلامتی کے خلاف سازش ہے۔ امپورٹڈ حکومت گھٹیا پن سے باہر آئے اور شفاف تحقیقات کروائے۔عمران خان پر حملہ کرنے والے عناصر کو قرار واقعی سزا ملنی چاہیئے۔