ملتان پاکستان(نمائندہ وائس آف جرمنی): ملک کی سب سے بڑی آئل ریفائنری پارکو کے آپریشنز کو پانچ روز کے لیے عارضی طور پر معطل کردیا گیا۔
تفصیلات کے مطابق پاک – عرب ریفائنری لمیٹڈ کی جانب سے بدھ کی شب 5 اپریل 2023 کو طے شدہ مرمتی کام کے تحت ریفائنری کے آپریشنز کو پانچ روز کے لیے عارضی طور پر معطل کیا گیا ہے۔
ترجمان پارکو نے بتایا کہ طے شدہ مرمتی کام کے تحت ریفائنری پر عارضی شٹ ڈاؤن لیا گیا ہے، ریفائنری میں پیداواری سرگرمیاں 11 اپریل 2023کو دوبارہ بحال کردی جائیں گی۔ترجمان کا کہنا تھا کہ مرمتی کام کے دوران ڈیزل اور پیٹرول کی سپلائی معمول کے مطابق جاری رہے گی۔
اس سے قبل ملک کی سب سے بڑی آئل ریفائنری پارکو کی بندش کی وجوہات ڈیزل کی ڈیمانڈ نہ ہونا بتائی جارہی تھی۔
ذرائع نے بتایا تھا کہ ایک ہفتے کے دوران ایران سے غیرقانونی طور پر ڈیزل اسمگل ہوکرملکی منڈی میں آیا، ایران سےایک لاکھ 20ہزار میٹرک ٹن ڈیزل ملکی منڈی میں آیا۔
ذرائع کا کہنا تھا کہ سیکریٹری پیٹرولیم نے ایران سے ڈیزل اسمگلنگ کی اطلاع کے باوجود کوئی اقدام نہیں اٹھایا، سیکریٹری پیٹرولیم پارکو بورڈ کےچیئرمین بھی ہیں۔
ذرائع کے مطابق پارکو آئل ریفائنری کی پرودکشن یومیہ ایک لاکھ 20 ہزار بیرل ہے اور مارکیٹ میں اسمگل شدہ ڈیزل آنےسےپارکوآئل ریفائنری کےڈیزل کی فروخت متاثر ہوئی، جس کے بعد پارکو کی اسٹوریج کیپسٹی مکمل ہوچکی ہے اور مجبوراً ریفائنری کی پروڈکشن بند کرناپڑی۔
ذرائع نے کہا کہ پارکو آئل ریفائنری کی بندش کی وجہ حقائق کے برعکس مین ٹینس بیان کی جارہی ہے، ریفائنری کا مین ٹینس شٹ ڈاؤن ہر 3سال بعدکیاجاتا ہے جبکہ ریفائنری کی مین ٹینس کوصرف ڈیڑھ سال کاعرصہ گزرا ہے۔
