وفاقی جرمن چانسلر فریڈرش میرس جمعہ 17 اپریل کو فرانسیسی دارالحکومت پیرس میں ہونے والی اس بین الاقوامی کانفرنس میں شرکت کریں گے، جس میں ایران جنگ کی وجہ سے بندش کی شکار آبنائے ہرمز کے دوبارہ کھولے جانے کے بارے میں مشاورت کی جائے گی۔
جرمن دارالحکومت برلن سے بدھ 15 اپریل کو موصولہ رپورٹوں میں بتایا گیا کہ چانسلر فریڈرش میرس کے پیرس کے اس دورے کا مقصد اس انٹرنیشنل کانفرنس میں شرکت کرنا ہو گا، جس میں کئی ایسے ممالک حصہ لے رہے ہیں، جو ایران جنگ کی وجہ سے تہران کی طرف سے بند کر دی گئی آبنائے ہرمز کو کھلوانے کے لیے ایک کثیر القومی دفاعی مشن میں اپنا کردار ادا کرنے کے لیے رضاکارانہ طور پر تیار ہیں۔
یہ بات برلن میں جرمن حکومتی ذرائع نے نیوز ایجنسی روئٹرز کو بتائی۔ اس مشاورتی کانفرنس کا اہتمام فرانس کے صدر ایمانوئل ماکروں کی طرف سے کیا جا رہا ہے اور اس کے پیچھے بنیادی سوچ خلیج فارس میں تیل اور گیس کی عالمی ترسیل کے لیے انتہائی اہم آبنائے ہرمز کو تحفظ کو یورپی ممالک کی سطح پر یقینی بنانا ہے۔
اس پیرس کانفرنس میں کئی دیگر یورپی ممالک کے سربراہان مملکت و حکومت کی شرکت بھی متوقع ہے۔
