پاکستان: پنجاب میں بڑھتے جرائم پر مریم نواز شریف کا سخت نوٹس، پولیس کو فوری اور مؤثر اقدامات کی ہدایت

ناصف اعوان-پاکستان،وائس آف جرمنی اردو نیوز

وزیراعلیٰ پنجاب مریم نواز شریف نے صوبے میں جرائم کی شرح میں اچانک اضافے پر سخت نوٹس لیتے ہوئے ہنگامی اجلاس طلب کر لیا۔ اجلاس کے دوران انہوں نے مختلف جرائم کی ویڈیوز خود شیئر کر کے شرکاء کو دکھائیں اور متعلقہ پولیس حکام پر شدید برہمی کا اظہار کیا۔

پولیس افسران سے باز پرس، پیشگی اقدامات پر زور
وزیراعلیٰ نے آر پی اوز، سی پی اوز اور ڈی پی اوز سے ویڈیو لنک کے ذریعے خطاب کرتے ہوئے جرائم کی روک تھام کے لیے پیشگی اقدامات کو یقینی بنانے کا ہدف مقرر کیا۔ انہوں نے ہدایت کی کہ تمام افسران کرائم کنٹرول ڈیپارٹمنٹ (سی سی ڈی) کے ساتھ مکمل تعاون کریں تاکہ جرائم کی بیخ کنی ممکن ہو سکے۔

شیخوپورہ اور فیصل آباد میں ناقص کارکردگی پر سرزنش
انہوں نے شیخوپورہ اور فیصل آباد میں جرائم پر قابو نہ پانے پر متعلقہ افسران کی سرزنش کی اور واضح کیا کہ کسی قسم کی غفلت برداشت نہیں کی جائے گی۔

جرائم میں اضافہ تشویشناک قرار
مریم نواز شریف نے کہا کہ جرائم کی شرح میں اچانک اضافہ نہ صرف شرمناک بلکہ انتہائی فکر انگیز ہے۔ انہوں نے کہا کہ "اتنی محنت کے بعد پنجاب کو سیف سٹی بنانے کی کوشش کی، اب دوبارہ سستی کی کوئی گنجائش نہیں۔”

انہوں نے واضح کیا کہ قتل، ڈکیتی، اغوا اور گمشدگی جیسے سنگین جرائم میں اضافہ کسی صورت قابل قبول نہیں، جبکہ چھوٹے جرائم کو بھی نظر انداز نہیں کیا جا سکتا۔

پولیس کو مکمل وسائل، اب کارکردگی دکھانے کا وقت
وزیراعلیٰ نے کہا کہ پولیس کو ہر قسم کی سیاسی مداخلت سے پاک کر دیا گیا ہے اور اب انہیں اپنی کارکردگی ثابت کرنا ہوگی۔ ان کے مطابق 100 فیصد میرٹ پر پولیسنگ کی وجہ سے انہیں تنقید کا سامنا بھی کرنا پڑا، تاہم وہ اس پالیسی پر قائم ہیں۔

انہوں نے بتایا کہ پولیس افسران کے تقرر کے لیے وہ خود انٹرویوز کرتی ہیں اور محکمہ پولیس کو بھرپور وسائل فراہم کیے گئے ہیں، جن میں جدید اسلحہ، آلات اور گاڑیاں شامل ہیں۔ انہوں نے مزید کہا کہ گزشتہ دو برسوں میں پولیس کو 527 ارب روپے کا ریکارڈ بجٹ دیا گیا، جس کی ماضی میں مثال نہیں ملتی۔

مختلف واقعات پر تشویش کا اظہار
وزیراعلیٰ نے گجرات میں بڑھتے جرائم، بسوں میں ڈکیتی اور بیگ چھیننے جیسے واقعات پر تشویش کا اظہار کرتے ہوئے کہا کہ ایسے واقعات عوام میں خوف و ہراس پیدا کرتے ہیں۔ انہوں نے لاہور کے علاقے گلبرگ میں گاڑی کی بیٹری چوری ہونے کی ویڈیو کو بھی شرمناک قرار دیا۔

اسی طرح منشیات کے بڑھتے رجحان اور سپیڈو بس میں کنڈیکٹر کی جانب سے ایک بچی پر تشدد کے واقعے پر بھی سخت ردعمل دیتے ہوئے کہا کہ اگر قانون کا خوف ہو تو ایسے واقعات رونما نہ ہوں۔

امن و امان کی بہتری اولین ترجیح
مریم نواز شریف نے اس عزم کا اظہار کیا کہ عوام کو تحفظ اور سکون فراہم کرنا حکومت کی اولین ترجیح ہے۔ انہوں نے کہا کہ امن و امان کی صورتحال بہتر بنانے کے لیے ہر ممکن اقدام کیا جائے گا اور اگر ضرورت پڑی تو سخت فیصلے بھی کیے جائیں گے۔

انہوں نے آخر میں پولیس حکام کو خبردار کیا کہ جرائم کے خاتمے کے لیے فوری اور مؤثر اقدامات کیے جائیں، کیونکہ عوام کو محفوظ ماحول فراہم کرنا ریاست کی بنیادی ذمہ داری ہے۔