کسی بھی غلطی کا زیادہ تباہ کن جواب دیا جائے گا: پاسداران انقلاب کا دوبارہ انتباہ

وائس آف جرمنی اردو نیوز،نیوز ڈیسک
سابق ایرانی مرشد علی خامنہ ای کی تدفین کی تقریبات کے آغاز کے ساتھ ہی، پاسدارانِ انقلاب نے امریکہ اور اسرائیل کو "کسی بھی قسم کی غلط فہمی” سے گریز کرنے کی تنبیہ کرتے ہوئے کہا ہے کہ وہ "پہلے سے کہیں زیادہ فیصلہ کن اور تباہ کن جواب دیں گے”۔
آج جمعہ کو ایک بیان میں پاسدارانِ انقلاب نے اس بات پر بھی زور دیا کہ وہ دیگر مسلح افواج کی شاخوں کے ساتھ "مکمل جنگی تیاری” کی حالت میں ہیں اور اس کا مقابلہ کرنے کے لیے تیار ہیں جسے انہوں نے "دشمن” قرار دیا۔
بیان میں دعویٰ کیا گیا کہ یہ تیاری "محض فوجی نمائش نہیں” بلکہ "ظلم اور جارحیت” کے خلاف ایرانی عوام کی نفرت کا ثبوت ہے۔
مزید برآں پاسدارانِ انقلاب نے "انتقام کی پکار” کا ذکر کرتے ہوئے دعویٰ کیا کہ یہ "نظریہ امریکہ، اسرائیل اور ان کے حامیوں کو مایوسی اور ناکامی سے دوچار کرے گا”۔
یہ بیان خامنہ ای کی تدفین کی تقریبات کے دوران سخت سکیورٹی انتظامات کے درمیان سامنے آئے ہیں۔ یہ بیان ایک ایسے وقت میں دیا گیا جب گذشتہ چند دنوں کے دوران ایرانی حکام نے بارہا امریکہ اور اسرائیل کے ساتھ محاذ آرائی کی پالیسی جاری رکھنے کی تصدیق کی ہے۔
یاد رہے کہ 28 فروری کو شروع ہونے والی جنگ کے پہلے ہی دن اسرائیلی اور امریکی حملوں نے ایرانی مرشد کے ہیڈ کوارٹر کو نشانہ بنایا تھا، جس کے نتیجے میں وہ متعدد اعلیٰ حکام اور عسکری کمانڈروں کے ساتھ مارے گئے تھے۔
تاہم جاری تنازع کے باعث انہیں 125 دنوں تک دفن نہیں کیا جا سکا، جبکہ تا حال یہ واضح نہیں ہے کہ آیا ان کے بیٹے مجتبیٰ خامنہ ای ، جنہیں ان کا جانشین مقرر کیا گیا ہے، تدفین میں شرکت کے لیے عوامی طور پر سامنے آئیں گے۔