یوکرینی صدر وولودیمیر زیلنسکی نے کہا کہ روس روز بروز اپنی کارروائیوں میں شدت لا رہا ہے اور عالمی شراکت داروں کو اس کے جواب میں زیادہ مؤثر اقدامات کرنے چاہییں تاکہ جنگ مزید نہ پھیل سکے۔
زیلنسکی کے مطابق کییف، زاپوریژیا، اوڈیسا، سومی اور خارکیف کے علاقوں میں رہائشی عمارتوں کو نشانہ بنایا گیا۔ زاپوریژیا میں ایک گھر پر حملے کے بعد ملبے تلے دب کر دو خواتین ہلاک ہو گئیں، جبکہ سومی شہر پر ایک علیحدہ حملے میں دو مزید افراد جان سے گئے۔
دوسری جانب یوکرین نے بھی روس کے اندر اہداف کو نشانہ بنانے کی حکمت عملی جاری رکھی ہوئی ہے۔ طویل فاصلے تک مار کرنے والے یوکرینی ڈرونز نے روسی آئل ریفائنریوں اور صنعتی تنصیبات کو نشانہ بنایا ہے۔ روس کے جنوبی کراسنوڈار علاقے میں ایک یوکرینی ڈرون حملے کے نتیجے میں تین افراد ہلاک اور دو زخمی ہو گئے۔
علاقائی گورنر کے مطابق ان حملوں سے دو صنعتی تنصیبات میں آگ بھڑک اٹھی۔ بعد ازاں روسی میڈیا نے اطلاع دی کہ حملوں میں سے ایک کا ہدف مقامی آئل ریفائنری تھی۔
یوکرین کے دارالحکومت کییف اور اس کے نواحی علاقوں میں بھی رات بھر روسی ڈرون حملے جاری رہے۔ کییف کے علاقے بوریسپل میں ایک گودام کو نشانہ بنائے جانے کے بعد آگ لگ گئی، جس کے نتیجے میں دو افراد زخمی ہوئے۔
ادھر روسی وزارتِ دفاع کا دعویٰ ہے کہ کییف پر حملے کے دوران ایک ایسے ڈیٹا سینٹر کو نقصان پہنچایا گیا جو موبائل انٹرنیٹ سروسز اور اسٹارلنک سیٹلائٹ مواصلاتی نظام کو سہولت فراہم کر رہا تھا۔
