سری لنکا: جیل میں ہنگامہ آرائی کے سبب 23 قیدی ہلاک، 100 سے زائد زخمی

By Voice of Germany Urdu News Team

حکام نے پیر کو بتایا کہ سری لنکا کی ایک جیل میں جھڑپوں میں چار محافظوں سمیت 23 افراد ہلاک اور 100 سے زائد زخمی ہو گئے ہیں۔
پولیس نے بتایا کہ علاقے کی ایک مرکزی جیل میں منشیات کا غیر قانونی کاروبار کرنے والے دو گروہوں کے قیدیوں کے درمیان رات بھر جھڑپوں کے بعد زخمیوں کو دارالحکومت کولمبو کے شمال میں واقع نیگومبو ہسپتال لے جایا گیا۔
ہسپتال کی ڈائریکٹر پشپا گاملاتھ نے کہا کہ اس سرکاری ہسپتال میں 23 لاشیں لائی گئی تھیں، اور 100 سے زیادہ زخمی قیدیوں اور محافظوں کو بھی داخل کرایا گیا۔
گاملاتھ نے ٹیلی فون پر اے ایف پی کو بتایا، ’’کچھ متاثرین بندوق کی گولیوں سے زخمی ہیں، کچھ شدید چوٹوں اور زخم کے ساتھ داخل ہوئے ہیں۔‘‘
حکام نے بتایا کہ لڑائی اتوار کی شام نیگومبو جیل میں شروع ہوئی، جس میں کئی ہزار قیدی رکھے گئے ہیں۔
جیسے ہی لڑائی کی خبریں جیل بھر میں پھیل گئیں، ایک ملحقہ حصے میں خواتین قیدیوں نے چھت پر چڑھ کر اتوار کی رات اپنی رہائی کا مطالبہ کیا۔

پولیس نے بتایا کہ چھت کا کچھ حصہ گر گیا جس سے کچھ خواتین زخمی ہوئیں۔
پولیس کمانڈوز کو پیر کو طلب کیا گیا لیکن انہیں جیل کے اندر تعینات نہیں کیا گیا۔
قیدیوں کے رشتہ داروں کا ایک بڑا ہجوم پیر کو جیل کے باہر اس وقت جمع ہوا جب فضائیہ نے علاقے کی نگرانی کے لیے ڈرون اور ایک ہیلی کاپٹر تعینات کیا۔
مقامی لوگوں نے بتایا کہ انہیں گولیوں کی آوازیں سنائی دیں۔
ایک پولیس اہلکار نے اے ایف پی کو بتایا، ’’حالات پر قابو پانے کی کوشش کے دوران چار محافظ بھی مارے گئے ۔‘‘ اس پولیس اہلکار نے مزید کہا، ’’آج صبح صورتحال ہاتھ سے نکل گئی۔‘‘
دسمبر 2020 میں، سری لنکا کی ایک اور جیل میں فسادات کے نتیجے میں 11 قیدی ہلاک اور 117 زخمی ہو گئے تھے، تب کووڈ 19 وبائی مرض کے عروج کے دوران، حکومت نے سینکڑوں قیدیوں کو بھیڑ بھری جیلوں سے رہا کر دیا تھا۔
سرکاری اعداد و شمار کے مطابق سری لنکا کی جیلوں میں اتوار تک 41,250 قیدی تھے، جو قیدیوں کی گنجائش سے چار گنا زیادہ تعداد ہے۔