جمہوریت کا فریب…….. علی عباس کاظمی

جمہوریت کے لیے خطرہ صرف آمریت نہیں، وہ حکمران بھی ہیں جو اقتدار تو جمہوریت کے ذریعے حاصل کرتے ہیں مگر اس کے اصولوں کو نظرانداز کر دیتے ہیں۔ جب حکمران عوام کے ووٹ کو اپنی کامیابی کا مستقل پروانہ سمجھنے لگیں، سیاسی جماعتیں اصولوں کے بجائے اقتدار کی سہولت دیکھ کر وفاداریاں تبدیل کریں اور طاقت کے مراکز عوامی فیصلے سے زیادہ اہمیت اختیار کر جائیں تو انتخابات محض ایک رسم بن کر رہ جاتے ہیں۔ امریکہ کے وسط مدتی انتخابات میں صدر ڈونلڈ ٹرمپ کی ریپبلکن جماعت کو پہنچنے والا انتخابی دھچکا دنیا کی سیاسی قیادت کے لیے اسی حقیقت کی یاد دہانی ہے کہ کوئی حکومت عوام کے اعتماد کے بغیر زیادہ دیر اپنی سیاسی طاقت برقرار نہیں رکھ سکتی۔امریکی جمہوریت بھی خامیوں سے پاک نہیں۔ وہاں دولت کا سیاسی اثر، انتخابی مہمات پر بھاری اخراجات، حلقہ بندیوں میں سیاسی مفادات اور ذرائع ابلاغ کی تقسیم جیسے مسائل موجود ہیں، لیکن اس نظام کی ایک اہم خصوصیت یہ ہے کہ صدر کی جماعت کو بھی عوامی فیصلے کے نتیجے میں پارلیمانی طاقت سے محروم ہونا پڑ سکتا ہے۔اس سے ایک ایسا توازن پیدا ہوتا ہے جو حکمرانوں کو یہ احساس دلاتا ہے کہ اقتدار کسی کی ذاتی جاگیر نہیں۔
پاکستان کی سیاسی صورت حال اس اصول کے بالکل برعکس کئی سوالات پیدا کرتی ہے۔ یہاں انتخابات سے پہلے سیاسی صف بندیوں، انتخابی اتحادوں اور امیدواروں کی وفاداریوں کی خبریں گردش کرتی ہیں، جبکہ انتخابات کے بعد نتائج کی شفافیت پر تنازعات جنم لیتے ہیں۔ ہر جماعت اپنی کامیابی کو عوامی شعور کا فیصلہ اور شکست کو کسی سازش کا نتیجہ قرار دینے میں دیر نہیں لگاتی۔ افسوس کہ ہمارے ہاں سیاسی جماعتوں نے انتخابات کو عوامی اعتماد حاصل کرنے کے بجائے اقتدار تک پہنچنے کی دوڑ بنا دیا ہے۔اس صورت حال کا سب سے خطرناک پہلو یہ ہے کہ پاکستان میں اقتدار کی سیاست طویل عرصے سے دو متوازی راستوں پر چلتی رہی ہے۔ ایک راستہ عوامی حمایت کا ہے اور دوسرا طاقتور حلقوں کی خوشنودی کا۔جب کسی سیاسی قیادت کو یہ یقین ہو جائے کہ عوامی مقبولیت کے باوجود اقتدار کے دروازے بند رہ سکتے ہیں اور طاقتور حلقوں کی حمایت سے سیاسی راستہ کھل سکتا ہے تو پھر وہ عوام کو قائل کرنے کے بجائے طاقت کے مراکز کو مطمئن کرنے میں زیادہ دلچسپی لینے لگتی ہے۔
پیپلز پارٹی کی مثال اس سیاسی تضاد کو سمجھنے کے لیے اہم ہے۔ یہ جماعت کبھی عوامی حقوق، جمہوری جدوجہد اور اسٹیبلشمنٹ مخالف سیاست کی نمایاں آواز سمجھی جاتی تھی۔ اس کی سیاسی شناخت میں عوامی طاقت اور جمہوری مزاحمت کا ایک تاریخی حوالہ موجود رہا ہے، لیکن وقت کے ساتھ اس کی سیاسی حکمت عملی اور مقتدر حلقوں کے ساتھ تعلقات نے اس شناخت پر سوالات پیدا کیے ہیں۔ ایک ایسی جماعت جس کی سیاسی تاریخ عوامی جدوجہد سے جڑی ہو، اگر اس کے کارکن یہ محسوس کرنے لگیں کہ قیادت کا اعتماد عوامی حمایت سے زیادہ طاقتور حلقوں کی قربت پر ہے تو یہ محض سیاسی حکمت عملی کا اختلاف نہیں رہتا، بلکہ جماعت کی نظریاتی بنیادوں کے لیے بھی خطرہ بن جاتا ہے۔ مسلم لیگ ن، تحریک انصاف اور دیگر بڑی سیاسی جماعتیں بھی مختلف ادوار میں مقتدر حلقوں سے تعلقات، سیاسی سہولت کاری اور اقتدار کے حصول کے لیے غیر جمہوری سمجھوتوں کے الزامات کا سامنا کرتی رہی ہیں۔ ہماری سیاست کا المیہ یہ ہے کہ اپوزیشن میں رہتے ہوئے ہر جماعت کو آئین کی بالادستی یاد آتی ہے، لیکن حکومت ملنے کے بعد اسی اصول پر اس کا رویہ اکثر تبدیل ہو جاتا ہے۔ جو مداخلت کل جمہوریت کے لیے خطرہ تھی، وہ آج سیاسی ضرورت یا قومی مفاد کے نام پر قابلِ قبول بنا دی جاتی ہے۔ یوں اصولوں کا پیمانہ بھی اقتدار کے ساتھ تبدیل ہوتا رہتا ہے۔
اس سیاسی منافقت کی ایک وجہ یہ بھی ہے کہ ہماری جماعتوں نے اپنے کارکنوں کو باشعور سیاسی شہری بنانے کے بجائے وفادار حامی بنانے پر زیادہ توجہ دی ہے۔ کارکن کو قیادت سے سوال کرنے، پالیسی پر اختلاف کرنے اور جماعتی فیصلوں میں حصہ لینے کا کتنا حق حاصل ہے؟ اکثر سیاسی جماعتوں میں قیادت کا انتخاب محدود خاندانوں، شخصیات یا مخصوص گروہوں کے گرد گھومتا ہے۔ جو جماعت اپنے اندر جمہوریت برداشت نہیں کر سکتی، اس سے ملک میں جمہوری اقدار کی مضبوطی کی توقع کیسے کی جا سکتی ہے؟ ہم اکثر اپنے پسندیدہ رہنما کی غلطی کو سیاسی مجبوری اور مخالف رہنما کی معمولی لغزش کو ناقابلِ معافی جرم سمجھتے ہیں۔ یہی دوہرا معیار سیاسی قیادت کو بے خوف بناتا ہے۔ سیاسی شعور کا مطلب کسی جماعت سے محبت ترک کرنا نہیں، بلکہ محبت کے باوجود اس سے جواب طلب کرنے کا حوصلہ پیدا کرنا ہے۔
پاکستان میں انتخابی اصلاحات کی بات بھی اکثر سیاسی مفادات کے گرد گھومتی ہے۔ الیکشن کمیشن کی آزادی، انتخابی نتائج کی شفافیت، ووٹوں کی گنتی کا قابلِ اعتماد نظام، تمام امیدواروں کے لیے یکساں مواقع اور انتخابی تنازعات کے بروقت فیصلے بنیادی تقاضے ہیں۔ کسی امیدوار کے پاس دھاندلی کے شواہد ہوں تو اسے انصاف ملنا چاہیے، لیکن محض سیاسی بیان بازی کو قانونی فیصلے کا متبادل نہیں بنایا جا سکتا۔ انتخابی اداروں کی ساکھ اس وقت قائم ہوگی جب ان کے فیصلے حکمران اور مخالف دونوں کے لیے یکساں قابلِ قبول ہوں۔ اسی طرح ریاستی مشینری، انتظامیہ اور دیگر اداروں کو انتخابی سیاست میں کسی جماعت کے حق یا مخالفت میں استعمال نہیں ہونا چاہیے۔ اگر عوام کو یہ یقین ہو جائے کہ ان کے ووٹ سے اقتدار کی تبدیلی ممکن نہیں تو وہ آہستہ آہستہ سیاسی عمل سے لاتعلق ہونے لگتے ہیں۔ یہ لاتعلقی کسی ایک جماعت کا نقصان نہیں، پورے ملک کا نقصان ہے۔ عوام کو صرف ووٹ ڈالنے کی ترغیب دینا کافی نہیں، انہیں یہ یقین بھی دلانا ضروری ہے کہ ان کا ووٹ محفوظ ہے، شمار ہوتا ہے اور اس کی اہمیت کسی طاقتور کی مرضی سے کم یا زیادہ نہیں ہوتی۔
امریکہ کے انتخابی تجربے سے پاکستان کو کسی دوسرے ملک کا سیاسی نظام جوں کا توں اپنانے کی ضرورت نہیں، بلکہ اس بنیادی اصول کو سمجھنے کی ضرورت ہے کہ کوئی حکومت، جماعت یا ادارہ عوامی احتساب سے بالاتر نہیں ہو سکتا۔ سیاسی استحکام مخالفین کو کمزور کرنے، اختلافی آوازوں کو دبانے یا اقتدار کے راستے ہموار کرنے سے پیدا نہیں ہوتا۔ یہ انصاف، آئینی حدود، ادارہ جاتی خودمختاری اور عوامی اعتماد سے جنم لیتا ہے۔ سیاست دانوں کو سمجھنا ہوگا کہ عوامی حمایت کے بغیر اقتدار کی بنیاد کھوکھلی ہے۔۔۔ اداروں کو تسلیم کرنا ہوگا کہ آئینی اختیار ہی ان کی اصل قوت ہے۔۔۔ اور عوام کو یہ فیصلہ کرنا ہوگا کہ وہ کب تک سیاسی وفاداری کے نام پر اپنی تنقیدی سوچ قربان کرتے رہیں گے۔ جمہوریت کا نقصان صرف آمروں کے دور میں نہیں ہوتا، منتخب حکومتیں بھی عوامی اختیار کو نظرانداز کرکے اسے کمزور کر سکتی ہیں۔