اسرائیل اور ایران فوری طور پر ایک دوسرے کے خلاف حملے بند کریں: ٹرمپ

امریکی نشریاتی ادارے فاکس نیوز کو دیے گئے ایک انٹرویو میں صدر ٹرمپ نے کہا کہ وہ ایران سے یہی کہیں گے کہ اس نے اپنی میزائل کارروائی کر لی ہے، اب مزید کشیدگی بڑھانے کے بجائے مذاکرات کی میز پر واپس آنا چاہیے۔ انہوں نے کہا کہ موجودہ حالات میں فریقین کے لیے سب سے بہتر راستہ سفارتی حل تلاش کرنا ہے۔ ٹرمپ نے یہ دعویٰ بھی کیا کہ ایران کی جانب سے حالیہمیزائل حملوں سے قبل واشنگٹن اور تہران کے درمیان ایک ممکنہ معاہدہ طے پانے کے قریب تھا۔ ان کے مطابق فریقین اس قدر قریب پہنچ چکے تھے کہ آئندہ چند دنوں میں معاہدے پر دستخط بھی ہو سکتے تھے، تاہم حالیہ واقعات نے اس عمل کو متاثر کیا ہے۔

امریکی خبر رساں ادارے ایکسیوس کو دیے گئے انٹرویو میں ٹرمپ نے کہا کہ وہ اسرائیلی وزیر اعظم نتن یاہو سے رابطہ کریں گے اور انہیں مزید جوابی کارروائی سے باز رہنے کا مشورہ دیں گے۔ ان کا کہنا تھا کہ دونوں فریق اپنی اپنی کارروائیاں کر چکے ہیں اور اب مزید تصادم کی ضرورت نہیں۔ دوسری جانب خطے میں جاری میزائل اور ڈرون حملوں نے عالمی برادری کو تشویش میں مبتلا کر دیا ہے۔ مختلف ممالک اور بین الاقوامی ادارے فریقین سے تحمل اور بردباری کا مظاہرہ کرنے کی اپیل کر رہے ہیں۔ مبصرین کے مطابق اگر کشیدگی میں کمی نہ آئی تو مشرق وسطیٰ ایک بڑے اور طویل علاقائی بحران کی جانب بڑھ سکتا ہے، جس کے اثرات عالمی سلامتی اور معیشت پر بھی مرتب ہو سکتے ہیں۔