پاکستان ڈیموکریٹک موومنٹ (پی ڈی ایم) اور جمعیت علمائے اسلام (ف) کے سربراہ مولانا فضل الرحمان نے سپریم کورٹ کے باہر پی ڈی ایم کا دھرنا ختم کرتے ہوئے کہا ہے کہ ’اگلی بار ایک دن کے نوٹس پر آ جائیں گے۔‘
پیر کو دھرنے سے خطاب میں انہوں نے کہا کہ ’ہم عدالت کی قدر ومنزلت بحال کرنا چاہتے ہیں۔ عدالت کے جانبدارانہ فیصلے قبول نہیں۔ اب فیصلہ عوام نے کرنا ہے اسلام آباد میں عوام کی عدالت لگی ہوئی ہے۔‘
’جانبدار جج اپنی حیثیت کو مجروح کر رہے ہیں۔ سیاست صرف سیاست دانوں کا کام ہے۔ میں چیلنج کرتا ہوں، چیف جسٹس صاحب آپ نے کتنا مس کنڈکٹ کیا ہے۔ وزیراعظم نے ہمیشہ آئین و قانون کی پاسداری کی ہے۔‘
مولانا فضل الرحمان نے کہا کہ ’اگر حکومت پر ناجائز ہاتھ ڈالنے کی کوشش کی تو عوام کی پارلیمنٹ اُس کا تحفظ کرے گی مگر تمہیں اپنے تحفظ کی جگہ نہیں ملے گی۔‘
