لاہورسمن آباد انڈر پاس کا آغاز، ٹریفک کیلئے کھول دیا گیا،نگران وزیراعلیٰ محسن نقوی کا سمن آبادانڈر پاس پراجیکٹ کا دورہ

لاہور پاکستان (نمائندہ وائس آف جرمنی):سمن آباد انڈر پاس کو کنٹریکٹ پیریڈ سے دو ماہ پہلے ٹریفک کیلئے کھول دیا گیا۔نگران وزیراعلیٰ پنجاب محسن نقوی نے سمن آباد انڈر پاس پراجیکٹ کا دورہ کیا۔اس موقع پربریفنگ میں بتایا گیا کہ سمن آباد انڈرپاس سے روزانہ تقریباً 2 لاکھ گاڑیوں کو آمدورفت میں بے پناہ سہولت ملے گی اور ایندھن کی مد میں کروڑوں روپے کی بچت ہو گی۔ سمن آباد انڈر پاس کی تعمیر کے دوران ملتان روڈ کو ایک دن بھی ٹریفک کے لیے بند نہیں کیا گیا۔انڈرپاس کے ڈیزائن میں تبدیلی کرکے 78 قیمتی درختوں کو بچایا گیا اور گرین بیلٹ پر 300 نئے پلانٹ لگائے گئے ہیں۔انڈرپاس کی تکمیل سے سمن آباد، گلشن راوی، توحید پارک، ملتان روڈ، چوبرجی، یتیم خانہ اور اس سے ملحقہ علاقوں کے لوگ مستفید ہونگے۔وزیراعلیٰ کو بریفنگ بتایا کہ سمن آباد انڈر پاس پراجیکٹ پر2 ارب سے زائد لاگت آئی، انڈرپاس 440 میٹر طویل اور 2 لین پر مشتمل ہے۔سمن آباد انڈر پاس کی تکمیل میں بڑا چیلنج قیمتی درختوں کو بچانا اور سیورج لائن کی منتقلی تھی۔ مسلسل فالو اپ کی وجہ سے کنٹریکٹ میں وضع کردہ ڈیڈ لائن 30ستمبر سے دو ماہ قبل اس منصوبے کو مکمل کر لیا گیا۔نگران وزیراعلیٰ پنجاب محسن نقوی نے سمن آباد انڈر پاس کے دور ے کے بعد میڈیا سے گفتگوکرتے ہوئے کہا کہ میرا کسی سے کوئی تعلق نہیں۔ہم الیکشن کمیشن کے ماتحت ہیں اورانہی کے مینڈیٹ سے کام کررہے ہیں۔جو الیکشن کمیشن کہے گا،وہی کریں گے۔وزیراعلیٰ محسن نقوی نے کہا کہ شدید بارشوں اور چیلنجز کے باوجود انڈر پاس کی تکمیل پر ڈی جی ایل ڈی اے محمد علی رندھاوا اور ان کی ٹیم شاباش کی مستحق ہے۔ اللہ کے فضل و کرم سے آج سمن آباد انڈر پاکس عوام کے لئے کھول دیاگیا ہے۔سمن آباد انڈر پاس پراجیکٹ طے شدہ وقت سے دو ماہ پہلے تیار ہوا۔انہوں نے کہا کہ میری مقررہ کردہ ڈیڈ لائن سے بارشوں کی وجہ سے کچھ تاخیر کا سامنا کرنا پڑا۔سیکرٹری ہاؤسنگ،سی اینڈ ڈبلیو اورایل ڈی اے کی ٹیم نے محنت کی۔ایل ڈی اے نے ری ڈیزائن کر کے اربوں روپے کی بچت کی۔سمن آباد انڈر پاس کوری ڈیزائن کر کے درخت اورسیوریج سسٹم کو بھی بچایا گیا۔وزیراعلیٰ محسن نقوی نے کہا کہ میری سپیڈ دراصل میری ٹیم کی سپیڈ ہے۔تمام پراجیکٹس اسی سپیڈ اورلگن کے ساتھ مکمل کیے جائیں گے۔ ساری ٹیم کوشش کرتی ہے تو مثبت نتائج سامنے آتے ہیں۔ایک سوال کے جواب میں وزیراعلیٰ نے بتایا کہ بارشیں پراجیکٹ کی بروقت تکمیل کے ہدف کومتاثر کررہی ہیں۔سوال کا جوواب دیتے ہوئے محسن نقوی نے کہا کہ پارکنگ مافیاء کو ہسپتال سے ہٹانے پر مسائل ہیں لیکن یہ مسئلہ حل کریں گے۔ایک ہسپتال دورہ کیاوہاں لوگوں کو اندرجانے کیلئے پیسے مانگے جارہے تھے۔دوسری دفعہ گیا تو پھر گارڈ کے خلاف داخلے کیلئے پیسے کی شکایت ہوئی۔وزیراعلیٰ نے کہا کہ مزارداتاصاحب کے سامنے سڑک کو ون وے کر کے ٹریفک مسائل حل کریں گے۔ صوبائی وزراء منصور قادر،عامر میر، سیکرٹری ہاؤسنگ، سیکرٹری سی اینڈ ڈبلیو،کمشنر لاہور ڈویژن، سی سی پی او لاہوراورسی سی پی بھی اس موقع پر موجود تھے۔