سی سی پی اوبلال صدیق کمیانہ کی زیر صدارت اہم اجلاس،امن و امان کی مجموعی صورتحال سمیت دیگر پیشہ ورانہ امور کا جائزہ

لاہور پاکستان(نمائندہ وائس آف جرمنی): سربراہ لاہور پولیس بلال صدیق کمیانہ کی زیر صدارت کیپٹل سٹی پولیس ہیڈ کوارٹرز میں ایک اہم اجلاس منعقد ہوا۔جس میں امن و امان کی مجموعی صورتحال سمیت دیگر پیشہ ورانہ امور کا جائزہ لیا گیا۔اجلاس میں منشیات اور بجلی چوری کے زیر ِ تفتیش مقدمات کو جلد سے جلد یکسو کرنے سے متعلق مختلف امور پر تبادلہ خیال ہوا۔سی سی پی او لاہور نے ڈویژنل ایس پیز کو محرم الحرام کی آمد کے پیش ِ نظر بہترین سکیورٹی انتظامات کیلئے تمام سٹیک ہولڈرز سے میٹنگز کرنے کی ہدایات جاری کیں۔
اجلاس سے خطاب کرتے ہوئے بلال صدیق کمیانہ نے بچوں اور عورتوں کو ڈھال بنا کر بھیک منگوانے والے پیشہ ور منظم گروہوں کے خلاف کریک ڈاؤن کے احکامات جاری کرتے ہوئے کہا کہ گداگروں کے ٹھیکیداروں کے گرد گھیرا تنگ کیا جائے اور بچوں کو آلہ کار بناکر بھیک منگوانے والے گداگر مافیا کو قانون کے شکنجے میں لایا جائے۔سی سی پی او لاہور نے کہاکہ سنگین مقدمات حل کرنے کے لیے فرانزک شواہد،پنجاب سیف سٹیزاتھارٹی کے کیمروں اور جدید ٹیکناجی سے بھرپور استفادہ کیا جائے۔ انہوں نے کہا کہ مجرموں کو کیفرکردار تک پہنچانے کیلئے انویسٹی گیشن کامعیار مزید بہتر بنائیں اورخطرناک مجرمان کو قرار واقعی سزائیں دلوا کر شہریوں کو انصاف کی بلا تاخیر فراہمی یقینی بنائی جائے۔اجلاس میں ڈی آئی جی(انوسٹی گیشن) ذیشان اصغر، ڈی آئی جی(آگنائزڈ کرائم یونٹ) عمران کشور،ڈی آئی جی(آپریشنز)فیصل کامران، ایس ایس پی(انوسٹی گیشن)انوش مسعود چوہدری اور ڈویژنل ایس پیز نے شرکت کی۔