کئی سالہ ’بلیک میلنگ‘: دو خواتین کے ہاتھوں ’معالج‘ قتل

(سید عاطف ندیم-پاکستان): پاکستان میں دو خواتین کو ایک مبینہ ’روحانی معالج‘ کے گلا گھونٹ کر قتل کے الزام میں گرفتار کر لیا گیا ہے۔ مقتول نے مبینہ طور پر ان دونوں خواتین کی ویڈیوز بنا رکھی تھیں اور انہیں سالہا سال سے بلیک میل کرتا چلا آ رہا تھا۔
پاکستانی صوبہ پنجاب کے دارالحکومت لاہور سےموصولہ رپورٹوں کے مطابق پولیس نے بتایا کہ ان دونوں خواتین نے اعتراف کر لیا ہے کہ انہوں نے اس نام نہاد ‘روحانی معالج‘ کا دوپٹے کے ذریعے گلا گھونٹ کر قتل کیا۔
پولیس نے بتایا کہ ان خواتین نے اپنے اعترافی بیان میں کہا کہ مقتول کا نام ریاض حسین تھا اور ان خواتین نے اس سے ماضی میں اس لیے رابطہ کیا تھا کہ وہ اس کے ذریعے خود پر کسی کی طرف سے کیے گئے مبینہ کالے جادو کے اثر سے نکل سکیں۔
تاہم اس کوشش کے دوران مبینہ ‘روحانی عامل‘ نے ان دونوں خواتین کی ایسی ‘نازیبا‘ ویڈیوز بنا لی تھیں، جن کو عام لوگوں تک پہنچا دینے کی دھمکی دے کر وہ مبینہ طور پر انہیں کئی سال سے بلیک میل کرتا چلا آ رہا تھا۔
یہ واقعہ صوبہ پنجاب کے شہر ملتان میں پیش آیا، جس کے بارے میں پنجاب پولیس کے جاری کردہ ایک بیان میں کہا گیا، ”دوران تفتیش پتہ چلا ہے کہ مقتول ریاض حسین اپنی زندگی میں طویل عرصے تک بہت سی خواتین کا جنسی استحصال کرتا رہا تھا اور یہ سب کچھ اس نے مبینہ طور پر روحانی علاج کے نام پر کیا تھا۔‘‘
پولیس نے مزید بتایا کہ ان دونوں خواتین نے، اپنے ایک کزن اور ایک دوسرے مرد کی مدد سے، اس نام نہاد معالج کا ڈوپٹے کے ذریعے گلا گھونٹ کر قتل کیا اور بعد میں اس کی لاش ایک جگہ پر پھینک دی۔
ملتان پولیس کے مطابق ان چاروں مشتبہ ملزمان کو گرفتار کر لیا گیا ہے اور ساتھ ہی ان کی مبینہ طور پر مدد کرنے والے ایک پانچویں فرد کو بھی، جو ایک مرد بتایا گیا ہے۔
پاکستان میں، جو ایک قدامت پسند مسلم مذہبی اکثریت والا ملک ہے، نام نہاد روحانی عاملوں اور جعلی پیروں کا کاروبار عروج پر رہتا ہے۔ ایسے جعلی عاملوں اور پیروں کے ماننے والے ‘مرید‘ اکثر ان پر اندھا دھند اعتماد کرتے ہیں جبکہ وہ زیادہ تر ان افراد کا کئی طرح سے استحصال کرتے ہیں۔
پاکستان میں 2022ء میں ایک ایسی حاملہ خاتون کو ایک ہسپتال میں لایا گیا تھا، جس کے سر میں لوہے کا ایک کیل ٹھونک دیا گیا تھا، اس بات کی ”ضمانت‘‘ کے طور پر کہ وہ خاتون لازمی طور پر ایک بیٹے کو جنم دے گی۔
اسی طرح ماضی قریب میں ایک ایسی خاتون کا انتقال بھی ہو گیا تھا، جسے ایک جعلی پیر ‘روحانی علاج‘ کے نام پر کئی دنوں تک ڈنڈوں سے پیٹتا رہا تھا۔ یہ نقلی پیر بھی ‘جن نکالنے کے نام پر‘ اس خاتون کے قتل کر مرتکب ہوا تھا۔