بلاول ہاؤس لاہور کی سیکیورٹی سے متعلق افواہیں بے بنیاد ہیں: عظمی بخاری

لاہور (مخدوم حسین سے)وزیر اطلاعات و ثقافت پنجاب عظمٰی بخاری نے بلاول ہاؤس لاہور کی سیکیورٹی واپس لینے سے متعلق خبروں کو سختی سے مسترد کر دیا ہے۔ اپنے بیان میں انہوں نے کہا ہے کہ بلاول ہاؤس لاہور کی سیکیورٹی واپس لینے کی خبریں سراسر جھوٹ اور من گھڑت ہیں، ان کا حقیقت سے کوئی تعلق نہیں۔انہوں نے میڈیا اور صحافی برادری پر زور دیا کہ وہ غیر مصدقہ اور فیک خبریں چلانے سے گریز کریں اور صحافتی اصولوں کے مطابق درست معلومات عوام تک پہنچائیں۔ عظمٰی بخاری نے واضح کیا کہ بلاول ہاؤس لاہور میں سیکیورٹی معمول کے مطابق موجود ہے اور کسی قسم کی تبدیلی نہیں کی گئی۔وزیر اطلاعات پنجاب نے کہا کہ عوام میں بے بنیاد افواہیں پھیلانے کی کوئی گنجائش نہیں ہونی چاہیے، ذمہ دارانہ صحافت وقت کی اہم ضرورت ہے۔