عبوری امن معاہدے پر عمل درآمد کے لیے ایرانی امریکی مذاکرات کا آغاز سوئٹزرلینڈ میں

یورپی ملک سوئٹزرلینڈ کی طرف سے بتایا گیا کہ امریکہ اور ایران کے مابین جنگ بندی کے لیے اب دستخط شدہ عبوری معاہدے پر عمل درآمد کے لیے ’ابتدائی نوعیت کے مذاکرات‘ سوئٹزرلینڈ کے پہاڑی علاقے بیورگن شٹوک میں ہوں گے۔

جنیوا سے موصولہ رپورٹوں کے مطابق بیرن میں سوئس وزارت خارجہ کی طرف سے کہا گیا کہ ابھی تک ان مذاکرات کا جمعے کے روز انعقاد ایک طے شدہ امر ہے اور اس میں امریکہ اور ایران کے نمائندے حصہ لیں گے۔

ساتھ ہی ان مذاکرات میں ایران جنگ کے خاتمے کے لیے ثالثی کرنے والے ممالک کے طور پر پاکستان، قطر اور دیگر ممالک کے ثالث بھی شامل ہوں گے۔

نیوز ایجنسی اے ایف پی کی رپورٹوں کے مطابق سوئس وزارت خارجہ کے آج جاری کردہ اس بیان سے وہ بے یقینی ختم ہو گئی ہے،  جو ان مذاکرات کے انعقاد کے حوالے سے پائی جاتی تھی۔

یہ اعلان رواں ہفتے منگل کے دن کیا گیا تھا کہ جمعے کو امریکی ایرانی ڈیل پر عملہ درآمد سے متعلق ابتدائی نوعیت کے یہ مذاکرات وسطی سوئٹزرلینڈ میں لوسیرن کے قریب بیورگن شٹوک کے ایک لگژری ہوٹل کمپلیکس میں ہوں گے۔

شروع میں یہ کہا گیا تھا کہ تہران اور واشنگٹن کے مابین جس جنگ بندی ڈیل پر اتفاق ہو گیا ہے، اس پر دستخط جمعے کے دن سوئٹرزلینڈ میں کیے جائیں گے۔ لیکن اب چونکہ اس ڈیل پر امریکہ، ایران اور پاکستان کی طرف سے دستخط جمعے سے پہلے ہی کیے جا چکے ہیں، اس لیے بیورگن شٹوک مذاکرات میں زیادہ تر توجہ اس پہلو پر مرکوز رہے گی کہ اس عبوری امن معاہدے پر عمل درآمد کے لیے باقاعدہ مکالمت شروع کر دی جائے۔

بیورگن شٹوک مذاکرات میں متوقع طور پر ایران کی طرف سے پارلیمانی اسپیکر اور اعلیٰ ترین مذاکراتی نمائندے محمد باقر قالیباف حصہ لیں گے جبکہ امریکہ کی طرف سے اس مکالمت میں نائب صدر جے ڈی وینس کی شرکت کی امید ہے۔

تاہم سوئس حکام نے اس بارے میں باضابطہ طور پر کوئی معلومات فراہم نہیں کیں کہ ان مذاکرات میں کون کون شامل ہو گا یا ان کا ایجنڈا کیا ہو گا۔