اینٹی کرپشن پنجاب قبضہ مافیا کے خلاف سرگرم لاہور میں قبضہ مافیا کیخلاف بھرپور کارروائیاں جاری۔

لاہو پاکستان(نمائندہ وائس آف جرمنی): ڈائریکٹر جنرل اینٹی کرپشن پنجاب ندیم سرور نے کہا ہے کہ محکمہ اینٹی کرپشن قبضہ مافیا کے خلاف سرگرم ہو گیا ہے اور لاہور میں قبضہ مافیا کیخلاف بھرپور کارروائیاں جاری ہیں۔ انہوں نے کہا کہ آج محکمہ اینٹی کرپشن، اے سی سٹی اور ایس پی صدر کی سربراہی میں ڈسٹرکٹ ایڈمن کی ٹیم نے غیر قانونی تعمیرات روکنے کیلئے پارک ویو سوسائٹی میں آپریشن کیا کیونکہ سرکاری اراضی پر پارک ویو سوسائٹی کی جانب سے تعمیرات کی جا رہی تھیں۔سرکاری زمین پر 6 مکانات تعمیر کئے گئے تھے۔ ایک گھر میں لوگ رہائش پذیر تھے۔ تمام مکانات کو سرکاری تحویل میں لے لیا گیا ہے۔2 زیر تعمیر مکانات کو فوری مسمار کر دیا گیا ہے۔پارک ویو میں غیر قانونی تعمیرات اور تجاوزات کیخلاف پہلی بار کارروائی کی گئی ہے۔ لاہور میں تمام غیر قانونی ہاؤسنگ سوسائٹیوں کے خلاف کارروائیاں کی جا رہی ہیں۔