شہریوں کے جان ومال کا تحفظ اور امن و امان برقرار رکھنا لاہور پولیس کی اولین ترجیح ہے، سربراہ لاہور پولیس ایڈیشنل آئی جی بلال صدیق کمیانہ
کرائم کنٹرول اور سروس ڈیلیوری کے حوالے سے پولیس کارکردگی اور سہولیات کے معیار میں بہتری کے لئے مربوط سٹریٹیجک اور آپریشنل اقدامات کئے گئے ہیں، سربراہ لاہور پولیس
لاہور پاکستان(نمائندہ وائس آف جرمنی):سربراہ لاہور پولیس ایڈیشنل آئی جی بلال صدیق کمیانہ نے کہا کہ شہریوں کے جان ومال کا تحفظ اور امن و امان برقرار رکھنا لاہور پولیس کی اولین ترجیح ہے۔کرائم کنٹرول اور سروس ڈیلیوری کے حوالے سے پولیس کارکردگی اور سہولیات کے معیار میں بہتری کے لئے مربوط سٹریٹیجک اور آپریشنل اقدامات کئے گئے ہیں۔اعداد و شمار کے مطابق لاہور پولیس نے رواں سال کے ابتدائی اڑھائی ماہ کے دوران جرائم پیشہ و قانون شکن عناصر کے خلاف کارروائی کرتے ہوئے مجموعی طور پر میں 25483 جرائم پیشہ و قانون شکن عناصر گرفتار کرکے متعلقہ تھانوں میں مقدمات درج کئے۔سی سی پی او بلال صدیق کمیانہ نے بتایا کہ شہر میں بدمعاشوں،رسہ گیروں اور شہریوں کو اسلحہ کی نمائش سے ہراساں کرنے افراد اور ناجائز اسلحہ کے خلاف رواں ماہ گرینڈ آپریشن کے دوران 09 کلاشنکوف،127 رائفلز،89 بندوقیں، 1525 پسٹلز اور ریوالور جبکہ 10 ہزار سے زائد گولیاں برآمد کرکے 1734 ملزمان گرفتار کرکے متعلقہ تھانوں میں مقدمات درج کر لیے ہیں۔ہوائی فائرنگ اور اسلحہ کی نمائش کے ذریعے شہریوں کو ہراساں کرنے والے 234 ملزمان بھی گرفتار کئے گئے۔بلال صدیق کمیانہ نے مزید کہا کہ اڑھائی ماہ کے دوران منشیات فروشوں کے خلاف کریک ڈاؤن میں مجموعی طورپر 2360 ملزمان کو گرفتار کرکے ان کے قبضہ سے 1074کلوگرام چرس،15 کلو 690 گرام ہیروئن،05 کلو 316 گرام سے زائد آئس اور 26 ہزار 663 لٹر شراب برآمد کی گئی۔انہوں نے بتایا کہ اسی طرح رواں سال اب تک قمار بازوں کے خلاف کارروائی کے دوران 1275 ملزمان کو گرفتار کیا گیا جن کے خلاف 277 مقدمات درج کر کے ملزمان کے قبضہ سے قمار بازی پر لگائی گئی 45 لاکھ 27 ہزار روپے سے زائد رقم برآمدکی گئی۔مزید براں اڑھائی ماہ میں لاہور پولیس نے سنگین جرائم میں ملوث کیٹیگری اے کے 1094 اور کیٹگری بی کے 8401 مجرموں سمیت 12886 اشتہاری، عادی مجرموں اور عدالتی مفروروں مجرمان کو گرفتار کیا۔ پتنگ بازی ایکٹ کی خلاف ورزی میں ملوث 2082 ملزمان گرفتار کرکے 2073 مقدمات درج کئے گئے۔ملزمان کے قبضے سے 33ہزار سے زائد پتنگیں، 26 سو سے زائد ڈور چرخیاں اور بڑی تعداد میں پتنگ سازی کا سامان بھی برامد کیا گیا۔نیشنل ایکشن پلان کے تحت رواں سال کے ابتدائی اڑھائی ماہ کے دوران میں 6646 قانون شکن عناصر کو گرفتار کرکے متعلقہ تھانوں میں مقدمات درج کیے گئے۔
